Grana de crisantemu

Esti llibru fala de ti, del to mieu a esnalar anque esnales, del to mieu al futuru anque nun te quede más remediu que tener ún, por si te lu piden; porque tu tampoco nun conoces «el posu del miéu que dexa la fame na palabra mañana», pero temes que lu conozan les tos fíes… o los tos silencios. Porque vas lleer el poema Relevu y va llicuásete la entereza al saber que la vida destrúi, pero constrúise tamién sobre les ruines. Porque sabes que’l pronome conmigo, cuando s’acompaña del alverbiu siempres, ye la mayor de les mentires. Porque tienes dalguién a quien volver, «como quien vuelve a un llugar». Podría escoyer un versu de caún de los poemes d’esti llibru y esi versu diba ser la to vida silabeada.

Alfredo González